فرصة أنا ملك الله

فرصة أنا ملك الله

📖الشاهد: "الَّذِي مَاتَ لأَجْلِ الْجَمِيعِ، كَيْ يَعِيشَ الأَحْيَاءُ فِيمَا بَعْدُ لاَ لأَنْفُسِهِمْ، بَلْ لِلَّذِي مَاتَ لأَجْلِهِمْ وَقَامَ" ( ٢ كو٥ : ١٥ ).

🎯الهدف: إن الطفل يفهم إن جزء من العبادة هو إن حياتي تكون ملك لربنا، مش بس بالكلام، لكن بالأفعال كمان.

💡الشرح:
زمان في العهد القديم، الله اختار شعب مخصوص ليه – كانوا شعب إسرائيل. دلوقتي في العهد الجديد، الله اختار الكنيسة، يعني إحنا، شعبه الجديد.
كل واحد فينا لما بيصدق في يسوع ويتبعه، بيبقى ملك له، مش لنفسه. حياتنا مش بتاعتنا، دي بتاعة اللي مات علشاننا وقام.
يعني وأنا في المدرسة، أو في البيت، أو بلعب، أو بكبر وأشتغل، دايمًا فاكر إني ملك لربنا، وعايش علشانه.
الله هو اللي بيساعدنا كل يوم نعيش له ونخصص نفسنا ليه "كما يحقُ لِلدَّعْوةِ الَّتِي دعيتم بها" (أف ١:٤). والتخصيص ده مش حاجة بتحصل مرة واحدة، لأ، ده بيحصل طول الحياة.
أنا مش بعبد الله بس بكلامي، لكن كمان بخصص حياتي كلها ليه. بعمل اللي هو عايزه مني، وانشغل باللي عاوزني انشغل بيه، وبقدم له قلبي وتفكيري وكل حاجة فيا.

⚠️ خد بالك من:
مهم تشرح للطفل إن كوني ملك لربنا مش معناها إني هبقى ممل أو مقيد أو مش هعرف أفرح. بالعكس، إحنا بقينا ملكه لأننا عاوزين نكون مخصصين لله لأننا "نُحِبُّه لأنه هو أحَبَّنا أولا" (ايو ١٩:٤).
هو اللي خلانا غاليين ولينا قيمة بعد ما كنا مستعبدين للخطية. دلوقتي إحنا أحرار، وهو اللي اشترانا بحبه.
علشان كده، بنقول له: إحنا عايزين نكون ملكك يا رب، مش غصب عنّا، لكن لأننا بنحبك.

🎭 وسيلة الإيضاح:
هات الكاس بتاع مائدة العشاء الرباني، ووريه للأطفال، واسألهم:
• إيه ده؟
• بنحط فيه إيه؟
• ينفع نحط فيه عصير مانجو أو نستخدمه في أي وقت تاني؟................. (أكيد هيقولوا لأ).
• بالظبط كده! زي ما الكاس ده مخصص لله بس، إحنا كمان لما بنصدق في المسيح جه واتصلب علشان خطايانا ونتبع المسيح، بنبقى مخصصين له. يعني حياتي مش لأي شخص، لكن لربنا بس. بعمل اللي هو عايزه مني، وهو مركز تفكيري في كل أمور حياتي.
في الآخر:
شجع الأطفال يصلوا ويطلبوا من الله إنهم يكونوا ملكه ومخصصين له، ويقولوله:
"يا رب، خُد قلبي وحياتي، وخليني أكون بتاعك في كل يوم."

🎶الترانيم المقترحة: 
۱. مشكلتي كانت كبيرة.
٢. حتى في عمري الصغير. 
٣. بقدم ليك. 
٤ . يا يسوع أنا ماشي وراك.