فرصة السماء
السماء مكان حقيقي جميل مع الله، من غير حزن أو ألم، فيه بس فرح وسلام وأمان، وكل اللي يحبوا الله هيعيشوا معاه هناك للأبد.
فرصة السماء
📖الشاهد: "أَنَا أَمْضِي لأُعِدَّ لَكُمْ مَكَانًا، وَإِنْ مَضَيْتُ وَأَعْدَدْتُ لَكُمْ مَكَانًا آتِي أَيْضًا وَآخُذُكُمْ إِلَيَّ،" (يو 14: 2-3).
🎯الهدف: إن الطفل يفهم إن أجمل مكان ممكن يكون فيه هو مع الله في السماء، وإن دي حاجة حقيقية ومستنيه كل اللي بيحبوا الله .
💡الشرح:
في العصر ده الأطفال حواليهم حاجات كتير بتشدّهم، زي الموبيلات، البلاي ستيشن، التابلت... ممكن يقعدوا بالساعات قدامهم ومش يحسّوا بالوقت. لكن لما ييجي وقت درس الكنيسة أو الترانيم ممكن يزهقوا بسرعة.
علشان كده مهم إننا نرسم لهم صورة صحيحة عن الله، وعن تواجدنا في حضرنه.
أحنا عارفين أننا في السماء هنفضل نسبّح ونغني بس! الطفل ممكن يتخيل إنها حاجة مملة!
لكن الحقيقة إن السماء مش كده خالص.
الكتاب المقدس بيقول إن الله هيمسح كل دمعة، ومش هيكون فيه حزن ولا وجع ولا تعب ولا أي حاجة تضايقنا.
كمان الله مجهز لينا مكان أجمل بكتير من أي حاجة شفناها أو حتى تخيلناها زي ما هو واضح في سفر الرؤيا بوصف جميل لسماء جديدة وأرض جديدة.
وأحلى ما في المكان ده أننا هنكون مع أجمل وأحن شخص... الله يسوع، اللي حبنا جدًا ومات علشاننا، وعايز يشاركنا المجد الأبدي.
يعني بدل ما نفضل نفكر في إن السما تسبيح بس، لازم نقولهم إن السما فيها فرح وسلام وحب، ومافيهاش ولا خوف ولا وجع، والأهم... فيها الله نفسه!
⚠️ خد بالك:
إحنا مش عارفين كل التفاصيل عن السماء، فبلاش نحكي حاجات مش مكتوبة في الكتاب المقدس.
لكن نأكد للأطفال على الحقيقة دي:
السماء حقيقية، والله هيكون معانا فيها، وكل حاجة صعبة بنعدي بيها دلوقتي (خطية، مرض، ظلم، فقر، ألم) مش هتكون موجودة هناك أبدًا.
🎭 وسيلة الإيضاح:
المدرّس يدخل على الأولاد بصوت عالي ومتحمس ويقول:
• 🎉ياااا جماعة عندي إعلان مهم جدااااااااااااااا!
عندنا رحلة فظييييعة! رحلة جامدة جدا!
فيها أكل كتيييير، ألعاب كتير، فرح وضحك، ومحدش هيزعلك،
ولا في حد هيتخانق معاك، ولا هتحس إنك لوحدك،
كل الناس هتبقى مبسوطة على الآخر!............................(خلي تعبير وشّك فرحان وشوق الأطفال بالكلام)
وبعدين تسألهم:
• مين نفسه ييجي الرحلة دي؟ ......................(ولما كلهم يرفعوا إيدهم، تقول:)
• الرحلة دي مش خيال، الرحلة دي هي السماء... المكان اللي الله بيجهزه لينا وبينتظرنا!
هناك مافيش مرض... مافيش دموع... مافيش حزن...
بس في فرح وسلام... والأهم... هنكون مع يسوع اللي بيحبنا وعايزنا نكون معاه دايمًا!"
أكد عليهم إن السماء الجديدة والأرض الجديدة مش قصة... دي حقيقة، مؤكدة في الكتاب المقدس، والله وعد بيها، وكل اللي بيحبوا الله ويؤمن بأن المسيح جه علشان يخلصه من خطيته هيروحوا معاه هناك وهيفضلوا معاه للأبد.
🎶الترانيم المقترحة:
۱. ماشي انا ماشي.
٢. ياكنيسه إفرحي.
٣. حفلة مكانها فى السما.
٤. ما تفوت يا زمان.