فرصة الصليب
الله كان مجهز الصليب من زمان علشان يخلّصنا، يعني مش حاجة حصلت فجأة، لكن خطة حب عظيمة أعلنها لأبطال العهد القديم.
فرصة الصليب
📖الشاهد: "لأَنَّهُ هكَذَا أَحَبَّ اللهُ الْعَالَمَ حَتَّى بَذَلَ ابْنَهُ الْوَحِيدَ، لِكَيْ لاَ يَهْلِكَ كُلُّ مَنْ يُؤْمِنُ بِهِ، بَلْ تَكُونُ لَهُ الْحَيَاةُ الأَبَدِيَّةُ." (يو 3: 16).
🎯الهدف: إن الطفل يعرف إن اللي حصل على الصليب ده مش كان فجأة، لكن الله كان مجهزه من زمان، وكل اللي حصل في العهد القديم كان إشارة للعهد الجديد ولعمل المسيح على الصليب.
💡الشرح:
هل تفتكروا إن الصليب ده كان فجأة؟ ولا الله مجهزه من زمان قوي.
شخصيات العهد القديم عاشوا قبل ما المسيح بكتير قوي، وكانوا مصدقين إن المخلّص جاي.
مكنوش عارفين هو هييجي إمتى بالضبط، أو هايخلصهم إزاي، بس كانوا مستنيينه ومصدقين كلام الله، وماتوا وهم مصدقين أن المسيح المخلص جاي، وعلشان كدة حسب إيمانهم بر.
والله في العهد القديم كان بيوريهم حاجات تخلّيهم يعرفوا أن المسيح جاي، زي مثلًا خروف الفصح، أو الحية النحاسية، أو الذبائح اللي كانوا بيقدموها.
الحاجات دي كلها كانت رموز بتدل على اللي هيحصل بعدين على الصليب. يعني الله كان بيقولهم: أنا مجهز خطة علشان أخلّصكم، استنوا المخلّص اللي جاي.
⚠️ خد بالك من:
مش لازم نشرح كل رموز العهد القديم بالتفصيل، إحنا عايزين الطفل يفهم إن الله كان عامل خطة من الأول علشان يخلّصنا.
مش حاجة حصلت كده وخلاص، لكن الله كان بيحبنا من زمان، ومرتب كل حاجة.
علشان كدة مش عاوزين نركز على الرموز، علشان نخلّي الأطفال يشكروا الله على محبته وعلى إنّه جه وخلصنا بعمله على الصليب.
🎭 وسيلة الإيضاح:
هات صورة سونار لجنين، ولو الجنين ده بقى طفل حقيقي دلوقتي في الفصل، يبقى ممتاز! .......وقول للأطفال:
• شايفين الصورة دي؟ ده طفل جوه بطن مامته... الصورة دي بتقول أن في طفل جاي بس كام واحد شافه في الحقيقة؟؟
• يعني حد فيكم شافه بعينه؟ ..............لأ
• بس هو موجود ولا لأ؟.........................أكيد هيقولوا: موجود، بس لسه ماطلعش.
• طيب هل علشان إحنا مش شايفينه دلوقتي يبقى مش حقيقي؟ لأ طبعًا!!! هو موجود وهيجي بعد شوية ويبقى وسطينا.
• كده بالظبط زي ما كان أبطال العهد القديم مصدقين إن المسيح جاي، رغم إنهم ماشفهوش، لكنهم كانوا واثقين في الله وكلامه وأنه هیبعت مخلص يخلصهم من خطاياهم.
• وإحنا كمان لازم نكون واثقين في الله ومحبته وخطته الكبيرة اللي جهزها من الأول وأن الصليب مكنش حدث حصل فجأة لكن الله كان مرتبله علشان يخلصنا.
في الآخر:
شجع الأطفال أنهم يصلوا ويسبحوا الله شاكرينه على تجهيزه الخلاص علشان يفدينا من خطايانا ومن الموت الأبدي.
🎶الترانيم المقترحة:
ا. ليه يا يسوع تختار.
٢. لما بشوف إزاى ياربي حبتني أنا.
٣. ربي يسوع علشاني.
٤. ربي الغالي بموته أداني حياة.