فرصة بكلم الله

فرصة بكلم الله

📖الشاهد: "يَا سَامِعَ الصَّلاَةِ، إِلَيْكَ يَأْتِي كُلُّ بَشَرٍ." (مز 65: 2).

🎯الهدف: إن الطفل يفهم إن جزء من نعمة الله لحياتنا إنه بقى ينفع نكلمه في أي وقت، وده علشان اللي عمله المسيح لينا.

💡الشرح: 
زمان في العهد القديم، مكانش ينفع أي حد يقرب من قدس الأقداس- المكان اللي بيمثل حضور الله- غير رئيس الكهنة، وكمان مرة واحدة في السنة! وكل الناس كانوا بيقفوا بره في الدار الخارجية.
بس الله كان نفسه يكلمنا، وكان نفسه نبقى قريبين منه، لكن عشان هو قدوس وإحنا خطاة، مكانش ينفع نقرب. علشان كده بعت لنا يسوع علشان يدفع تمن خطايانا، ولما يسوع مات علشاننا، إحنا بقينا نقدر ندخل لمحضر الله ونتكلم معاه في أي وقت.
ده جزء من النعمة اللي الله ادهالنا. مش لأننا أحسن من الناس، ولا لأننا من غير خطية، لأ، ده كله لأن يسوع جه ومات علشاننا، علشان يبقى لينا تواصل مستمر معاه.

⚠️ خد بالك من:
ما تقولش للأطفال إننا بنقف في محضر الله عشان إحنا كويسين، لأ، إحنا بنقف قدامه بس علشان يسوع، هو السبب الوحيد اللي بيخلينا نقدر نكلم الله ونسبحه ونتقرب منه. يعني في العهد القديم كان مستحيل نكون موجودين في محضر الله في أي وقت عاوزينه.
تسبيحنا مش لازم يبقى جامد أو ممل، لكن كمان مش لازم يبقى فيه فوضى. نرنم ونفرح ونستخدم حركات، بس نحترم محضر الله ونخلي الأطفال يحسوا إنه وقت مهم وجميل، فيه الله فعلاً حاضر وسطنا.
 
🎭 وسيلة الإيضاح:
قول للأطفال إن في مدرس ابنه مسافر بعيد ومفيش أي وسيلة يتواصل بيه بيها، لا موبايل ولا نت.
فالمدرس راح اشترى له موبايل، ودفعله فاتورة النت وشحنه كمان، وقاله:
• أنا عملت كل حاجة علشان تقدر تكلمني في أي وقت تحب، وأي مصاريف على التليفون أنا ها دفعها.
بعد كده قولهم:
ده مثل بسيط جدًا للي الله عمله لينا.
الله ما دفعش بس فلوس… لأ، ده دفع أغلى حاجة، دفع تمن خطايانا كلها، علشان نقدر نكلمه ونتواصل معاه في أي وقت.
والمبادرة كانت من الله، مش مننا. هو اللي حبنا من الأول، وبعت لنا يسوع علشان يفتح الطريق بينا وبينه.
في الآخر:
شجع الأطفال يصلوا ويشكروا الله إنه خلاهم يقدروا يكلموه في أي وقت.

🎶الترانيم المقترحة: 
١. تليفون السماء.
٢. تليفوني شغال يارب.
٣. في واحد بيفهمنى.
٤. أنا عند فى سر خطير.