فرصة الله يرعاني

فرصة الله يرعاني

📖الشاهد: "اللهُ الَّذِي رَعَانِي مُنْذُ وُجُودِي إِلَى هذَا الْيَوْمِ" (48 :15 تك).

🎯الهدف: إن الطفل يفهم إن الله بيرعى كل حاجة وكل المخلوقات، من أول الحاجات الكبيرة لحد الحاجات الصغيرة زي النملة. وإن مفيش حاجة ماشية كده بالصدفة، لكن كل شيء ماشي بترتيب الله واهتمامه.

💡الشرح: 
الله بيهتم بكل المخلوقات، حتى لو كانت صغيرة . في آخر سفر أيوب، الله كان بيشرح لأيوب إزاي هو مسيطر على الكون كله، وبيظبط كل حاجة فيه، وأنه بيرعى كل من فيه بكل عناية. يعني حتى الغراب، اللي الناس مش بتحبه ومحدش بيربيه، الله بيرتب له أكله وبيعتني بيه. ونفس الكلام على كل الناس، حتى اللي مش بيحبوه أو مش ماشيين وراه، برضه الله بيرزقهم ويدبر حياتهم.

في الآخر:
شجع الطفل إنه ما يخافش، لأن الله متحكم في الكل وشايفه وعارف احتياجاته ومش بينسى حد.

⚠️ خد بالك من:
في الفترة دي، إحنا بنركز إن الله بيرعى الكل، مش بس أولاده اللي بيحبوه، علشان كده ما تركزش في الفترة على إنه بس بيراعينا إحنا كمؤمنين. لأ، الهدف إن الطفل يفهم إن الله بيهتم بكل الناس وكل الكائنات، حتى اللي مش بيحبوه ولا يتبعوه. لأن الله دايمًا بيعتني بكل الكون. فالكل تحت رعايته وسلطانه، سواء كانوا مدركين ده أو لا. فالله بيقوم بدوره وبيهتم بالخليقة طول الوقت. 

🎭 وسيلة الإيضاح:
هات صور لطيور ملونة وجميلة، وبعد كده هات صورة لغراب، واسأل الأطفال:
• مين فيكم يحب يربي غراب؟.........................(معظمهم هيقول لأ، ساعتها قولهم:)
• مع إن محدش بيحب الغراب، لكن الله بيهتم بيه وبيرزقه، زي ما مكتوب في الآية.
يعني لو الله بيهتم بالغراب، تفتكروا مش هيهتم بينا إحنا؟
الله بيرتب حياة كل المخلوقات، وأكيد كل الناس اللي حياتهم أغلى من باقي المخلوقات، وكل حاجة ماشية تحت رعايته وتنظيمه.

🎶الترانيم المقترحة:
ا. الله خالق كل شئ. 
٢. لأنك انت معايا. 
٣. عاين اصدق كلامك.
٤. لما بتوتر وخوفي يزيد أكتر.