فرصة غيرني

فرصة غيرني

📖الشاهد: "وَنَحْنُ جَمِيعًا نَاظِرِينَ مَجْدَ الرَّبِّ بِوَجْهٍ مَكْشُوفٍ، كَمَا في مِرْآةٍ، نَتَغَيَّرُ إِلَى تِلْكَ الصُّورَةِ عَيْنِهَا، مِنْ مَجْدٍ إِلَى مَجْدٍ، كَمَا مِنَ الرَّبِّ الرُّوحِ." (٢ كو ۱۸:۳ )

🎯الهدف: إن الطفل يفهم إنه محتاج يتغير علشان يبقى شبه المسيح، وإنه حتى لو باين عليه إنه كويس، هو مش في أحسن حالة قدام الله.

💡الشرح:
ممكن تبان إنك كويس قدام نفسك وقدام الناس، وسلوكك حلو، والناس تقول عليك إنك محترم ومؤدب وبيحبوا يقلدوك،
بس الحقيقة ما ينفعش نقيس نفسنا على كلام الناس، لكن على مقاييس الله القدوس.
يعني ممكن أنا أكون شايف نفسي تمام، بس أول ما أقارن نفسي بيسوع، هكتشف إن لسه في حاجات جوايا محتاجة تتغير.
كلنا محتاجين نتغير علشان نكون شبه المسيح، وده مش بيحصل مرة واحدة، ده بيحصل يوم ورا يوم، طول ما الله شغال جوانا.

⚠️ خد بالك من:
ممكن طفل لما يكتشف إن جواه حاجات مش حلوة يحس بإحباط أو يزعل، علشان كده لازم نقوله إن التغيير بياخد وقت، وإن الله مش بيسيبنا لوحدنا، لكن بيساعدنا كل يوم. أننا نكون شبهه.
ومفيش حد بيبقى كامل، إحنا بنتغير حتة حتة، وكل مرة نكتشف حاجة غلط جوانا، بنروح لله ونقوله يساعدنا. وهو بيحبنا مهما كان فينا عيوب، وعايز يفضل يغيرنا علشان نكون شبهه أكتر وأكتر.

🎭 وسيلة الإيضاح:
هات سبورة وارسم عليها خط مستقيم بإيدك، واسأل الأطفال:
• إيه ده؟............................... (هايقولوا ده خط مستقيم).
• تفتكروا الخط ده مستقيم فعلاً؟......................(كتير منهم هيقولوا آه).

قوم جايب مسطرة، وحطها على الخط، هيبان إن الخط مش مستقيم زي ما كنا فاكرين. ممكن تخلي طفل ييجي يمسك المسطرة معاك علشان يتأكد بنفسه. وقولهم:
• إحنا ساعات بنشوف نفسنا كويسين، بس أول ما نقيس نفسنا على مقاييس الله، بنكتشف إن في حاجات كتير محتاجة تتغير جوانا. والله عايزنا نكون شبه يسوع، وده مش هيحصل غير لما نكون عارفين إننا محتاجين نتغير، ونطلب مساعدته.
وفي الآخر:
شجع الأطفال يصلوا ويقولوا:
"يا رب، غيرني، وخليني شبهك. ساعدني أشوف العيوب اللي جوايا، وأتقبلها علشان تتغير، لكن أفرح إنك بتغيرني كل يوم، وإني ملكك."

🎶الترانيم المقترحة:
۱. لما قلبي يبقى ملكك. 
٢. علمني أكون مسيحي حقيقي.
٣. بتحبني زي ما أنا.
٤ . قابلني - غيرني.
ه. لما الرب بيدخل قلب.